A do të ndikojë presioni amerikan rrjedhën e luftës në Ukrainë?

4 Gusht 2025

Më 31 korrik, presidenti amerikan Donald Trump paralajmëroi vendosjen e sanksioneve ndaj Rusisë për mungesën e përparimit drejt një armëpushimi në Ukrainë. Ai kishte vendosur një afat 10-ditor për ndaljen e luftimeve, që skadon më 8 gusht.

Trump tha se nuk është e qartë nëse sanksionet do ta ndryshojnë qasjen e Putinit, ndërsa njoftoi se i dërguari i tij, Steve Witkoff, do të udhëtojë në Moskë pas një vizite në Izrael. Ky do të ishte dënimi i parë nga Trump ndaj Kremlinit që nga fillimi i mandatit të tij të dytë.

Sanksionet e reja po diskutohen në kohën kur Rusia po intensifikon sulmet ndaj Ukrainës, përfshirë një goditje të fundit në Kiev që vrau mbi 30 persona. Trump i quajti këto sulme “të neveritshme”.

Dërgimi i Witkoff-it shihet si përpjekja e fundit për të bindur Rusinë para skadimit të afatit. Megjithatë, sipas sekretarit të Shtetit, Marco Rubio, bisedimet me rrethin e ngushtë të Putinit nuk kanë sjellë përparim. Edhe rundet e bisedimeve në Turqi nuk kanë dhënë rezultat.

Analisti Ivan Preobrazhensky thotë se Kremlini po përgatitet për përkeqësim të marrëdhënieve, pasi Trump e ka kuptuar se është mashtruar. Sipas tij, Moska mund ta përdorë vizitën e Witkoff për të fajësuar Kievin për ngecjen e paqes.

Trump theksoi se paqja kërkon përfshirjen e të dy palëve dhe se Ukraina duhet të bëjë lëshime për t’i dhënë fund luftës. John Kelley, përfaqësues i SHBA-së në OKB, tha se “ka ardhur koha për një marrëveshje”, por deri tani vetëm Ukraina është shprehur e gatshme për armëpushim.

Trump nuk specifikoi sanksionet, por përmendi “tarifa të ashpra” ndaj Rusisë dhe ndoshta edhe ndaj vendeve që bashkëpunojnë me të. Sipas analistëve, tarifat dytësore mund të kenë ndikim, sidomos në sektorin e energjisë, por mund të tensionojnë marrëdhëniet me vende si Kina, India dhe Turqia.

Trump ka përmendur gjithashtu forcimin e mbështetjes për Ukrainën përmes aleatëve të NATO-s, por ende nuk ka autorizuar dërgesa të reja armësh nga stoqet amerikane.

Sa i përket fushëbetejës, Rusia ka përparuar ngadalë por në mënyrë të vazhdueshme që nga viti 2023, duke rritur presionin përpara sezonit të dimrit. Deri tani, nuk ka shenja se Moska do të tërhiqet apo se afati i vendosur nga Trump do të ndryshojë rrjedhën e saj ushtarake.