Prishtinë, 21 nëntor 2026 07:28
Rusia ka ndërmarrë një nga sulmet më të mëdha ajrore ndaj Ukrainës që nga fillimi i luftës, duke përdorur dhjetëra raketa dhe qindra dronë. Sulmet kanë lënë të vrarë tetë persona, ndërsa përshkallëzimi është ndier edhe përtej kufijve të Ukrainës, pasi raketa dhe mjete të tjera ajrore ruse kanë shkelur hapësirën ajrore të Polonisë.
Sipas raportimeve të Associated Press, gjashtë persona janë vrarë në Kiev, pasi raketat balistike goditën tri ura mbi lumin Dnipro. Ndërsa dy persona të tjerë humbën jetën nga sulmi ndaj një stacioni hekurudhor në qytetin perëndimor të Lvivit.
Sulmet dëmtuan infrastrukturën e rëndësishme, duke përfshirë ura, objekte energjetike dhe sisteme të furnizimit me ujë.
Kryeministri ukrainas, Serhiy Koretsky, ka bërë të ditur se vetëm gjatë natës dhe ditëve të fundit Rusia ka lëshuar gjithsej 71 raketa, prej tyre 29 balistike, si dhe 404 dronë të tipit Shahed.
Ndërkohë, shqetësim të veçantë ka shkaktuar shkelja e hapësirës ajrore polake. Ministri i Mbrojtjes i Polonisë, Władysław Kosiniak-Kamysz, ka konfirmuar se tri objekte ruse, përfshirë dy raketa dhe një dron me motor reaktiv, kanë hyrë në hapësirën ajrore të vendit.
Njëra prej raketave ishte e tipit Kh-101, ndërsa autoritetet polake kanë nisur hetimet për të përcaktuar rrethanat e plota të incidentit.
Kryeministri polak, Donald Tusk, ka ngritur dyshimet se bëhet fjalë për një provokim të qëllimshëm nga Moska, duke theksuar se raketa nuk duket të ketë rënë në territorin polak si pasojë e një aksidenti.
Sekretari i Përgjithshëm i NATO-s, Mark Rutte, e ka cilësuar incidentin si shkelje serioze dhe të rrezikshme të hapësirës ajrore polake, duke e lidhur drejtpërdrejt me luftën që Rusia po vazhdon kundër Ukrainës.
Edhe udhëheqës të tjerë evropianë kanë dënuar veprimet e Moskës, duke paralajmëruar se ato synojnë të frikësojnë vendet që mbështesin Ukrainën dhe të dobësojnë bashkëpunimin ndërmjet NATO-s dhe Bashkimit Evropian.
Ministri britanik i Mbrojtjes, Wes Streeting, ka deklaruar se Perëndimi duhet t’i gjykojë synimet e presidentit rus, Vladimir Putin, përmes veprimeve të tij dhe jo vetëm përmes deklaratave për paqe.
Incidenti ndodh në një kohë kur Shtetet e Bashkuara po përpiqen të avancojnë negociatat për përfundimin e luftës, por Moska dhe Kievi vazhdojnë të kenë dallime të mëdha për kushtet e një marrëveshjeje të mundshme.

Ukraina dyshohet për sulmin me dron ndaj anijes ruse në Gjirin e Finlandës
Bordi i Paqes paralajmëron për dështimin e armëpushimit në Gaza, kritikon Izraelin dhe Hamasin
Tri fuqitë më të mëdha bërthamore në një tryezë
Trump kërcënon Iranin: Do të paguajë çmim të paparë nëse sulmon Washingtonin
Takim historik në Kinë: Xi, Trump dhe Putin në një tryezë për paqen botërore
Zelensky: SHBA-ja ngriti mundësinë e tërheqjes së Ukrainës nga Donbasi në këmbim të anëtarësimit në NATO
Vdekje në vendin e punës në Istog, Prokuroria nis hetimet
Sveçla: Fabrika e municionit, dëshmi e partneritetit strategjik Kosovë–Turqi
118 vjet nga Kongresi i Manastirit, 22 Nëntori shënon bashkimin e shqiptarëve përmes alfabetit