Macron i ashpër me Vuçiqin, Franca kundërshton veprimet që dëmtojnë dialogun me Kosovën

Paris, 3 gusht 2025

Presidenti i Francës, Emmanuel Macron, ka zhvilluar një bisedë me presidentin e Serbisë, Aleksandar Vuçiq, ku temë qendrore ishte dialogu Kosovë–Serbi.

Në një postim në rrjetin social X, Macron ka bërë të ditur se ka ritheksuar rëndësinë e vazhdimit të dialogut me Kosovën dhe ka dënuar çdo veprim të njëanshëm që mund ta rrezikojë këtë proces.

“I përsërita presidentit Vuçiq bindjen time se e ardhmja e Serbisë është në Evropë dhe shpresën që ajo të ecë përpara në një frymë dialogu, përmes reformave dhe në rrugën drejt anëtarësimit në BE. Rivlerësuam gjithashtu marrëdhëniet mes Francës dhe Serbisë dhe u pajtuam për t’i forcuar më tej bashkëpunimet tona”, ka shkruar Macron.

Ai tha se biseda përfshiu edhe zhvillimet më të gjera në rajon, ku ritheksoi mbështetjen e Francës për stabilitetin, unitetin dhe sovranitetin e Bosnje-Hercegovinës, si dhe rëndësinë e sundimit të ligjit.

“Së bashku me vendet e Ballkanit Perëndimor, Evropa jonë do të bëhet realitet dhe do ta përqafojë fatin e saj – në unitet, solidaritet dhe përgjegjësi”, përfundon postimi i presidentit francez.