Kurti paralajmëron se ulja e TVSh-së dhe akcizës për naftën do të dëmtonte buxhetin, thotë se po përgatit Pakon e Inflacionit 2.0

Prishtinë, 03.04.2026 18:36

Kryeministri Albin Kurti pasi u rikthye në Kuvend ka deklaruar se ulja e TVSH-së dhe akcizës për naftën do të krijonte një boshllëk të konsiderueshëm financiar në buxhetin e shtetit.

Ai shtoi se Qeveria është duke përgatitur Pakon e Inflacionit 2.0 në vlerë prej 200 milionë eurosh për të përballuar rritjen e çmimeve dhe për të mbështetur qytetarët dhe bizneset.

Gjatë seancës së jashtëzakonshme të Kuvendit për çmimet e naftës, Kurti theksoi se, në situata sfiduese, është e lehtë të kërkohen zgjidhje të shpejta, por Qeveria synon masa të qëndrueshme dhe afatgjata.

Ai përmendi se edhe ekonomitë më të mëdha në botë janë sfiduar nga rritja e çmimeve të karburanteve dhe energjisë, ndërsa në Kosovë furnizimi me derivate nuk ka pasur mungesa.

Kryeministri shpjegoi se ulja e TVSH-së dhe akcizës duket si një zgjidhje e thjeshtë, por është e kushtueshme dhe efekti i saj nuk është i garantuar.

“Në këtë kohë sfiduese, çmimet e naftës dhe energjisë kanë luhatje të vazhdueshme dhe është e lehtë të kërkohen zgjidhje të shpejta. Por detyra jonë nuk është të gjejmë rrugën më të lehtë, por ta zgjedhim rrugën më të drejtë, më të dobishme dhe më të qëndrueshme për vendin tonë. Situata aktuale ka sfiduar edhe ekonomitë më të mëdha në botë. Te ne efekti më dramatik nuk ka dhënë ende shenjat e veta pasi nuk ka pasur kufizim të furnizimit dhe as humbje të derivateve”, ka thënë Kurti.