Preshevë, 8 tetor 2026 13:09
Deputeti shqiptar në Kuvendin e Serbisë, Shaip Kamberi, i është përgjigjur deklaratave të presidentit serb, Aleksandar Vuçiq, i cili, sipas Kamberit, gjatë një deklarimi në mediat serbe e ka cilësuar atë si “më të keqin” ndër shqiptarët.
Kamberi ka kërkuar nga Vuçiqi të shpjegojë konkretisht se cilat qëndrime apo kërkesa të tij e kanë shtyrë presidentin serb në një vlerësim të tillë.
“Do të doja ta dija: pse? Çfarë po i pengojka tek unë?”, ka shkruar Kamberi.
Ai ka renditur disa nga çështjet për të cilat ka kërkuar të drejta për shqiptarët e Luginës së Preshevës, duke përmendur zbatimin e marrëveshjeve të nënshkruara nga Serbia, diskriminimin, arsimin në gjuhën shqipe, përfaqësimin proporcional, zhvillimin ekonomik dhe fondet për komunat shqiptare.
Kamberi ka rikujtuar edhe Rezolutën për të drejtat e shqiptarëve, të cilën e ka paraqitur në procedurë parlamentare në Kuvendin e Serbisë. Sipas tij, pjesë e angazhimit të tij politik kanë qenë edhe kërkesat për ballafaqimin e Serbisë me krimet e luftës dhe qëndrimi i tij lidhur me gjenocidin në Srebrenicë.
Një pjesë të veçantë të reagimit të tij, Kamberi ia ka kushtuar bashkimit politik të shqiptarëve të Luginës së Preshevës.
“Ne nuk jemi bashkuar kundër askujt. Jemi bashkuar për të përfaqësuar më mirë qytetarët që na kanë votuar”, ka deklaruar ai.
Ai ka ngritur gjithashtu pyetjen nëse bashkimi politik i shqiptarëve mund të jetë arsyeja që, sipas tij, ka shkaktuar shqetësim te pushteti në Serbi.
“Çfarë i pengon Vuçiqit te shqiptarët e bashkuar?”, ka pyetur Kamberi.
Në reagimin e tij, deputeti shqiptar është distancuar edhe nga shprehja “100 për një”, duke theksuar se personalisht nuk e ka përdorur kurrë atë dhe se nuk ka kërcënuar askënd në emër të kombit shqiptar.
“Sa për mua personalisht, nuk kam thënë kurrë ‘100 për një’. Nuk kam kërcënuar askënd me hakmarrje në emër të kombit tim. Nuk kam kërkuar që për një shqiptar të vriten 100 tjerë”, ka shkruar Kamberi.
Ai i ka kërkuar Vuçiqit që, në vend të etiketimit të tij si “më i keqi”, të përgjigjet konkretisht nëse ndonjëra prej kërkesave të tij është antikushtetuese, antidemokratike apo antievropiane.
Kamberi ka theksuar se kërkesat e tij, sipas tij, nuk synojnë t’u mohojnë të drejtat qytetarëve serbë.
“Unë nuk kërkoj të drejta për shqiptarët duke ua mohuar ato serbëve. Kërkoj barazi, përfaqësim dhe respekt për të drejtat që u takojnë të gjithë qytetarëve”, ka deklaruar ai.
Reagimi i Kamberit vjen në një periudhë kur partitë shqiptare në Luginën e Preshevës kanë bashkuar forcat në një listë të përbashkët për zgjedhjet parlamentare të Serbisë të 25 tetorit, me synimin për të siguruar përfaqësim të përbashkët politik të shqiptarëve në Parlamentin e Serbisë.

Kurti i drejtohet Zelenskyt: Njiheni Kosovën, mos i lini hapësirë propagandës së Putinit
Rashiq: Lista Serbe është elementi më destruktiv në historinë e serbëve
Kosova angazhon kompani amerikane për lobim në Uashington
Specialja në rend dite, deputetët sot përballen me votimin e ligjit
Kamberi e Memeti të kujdesshëm ndaj pushtetit të ri: Shqiptarët presin rezultate, jo premtime
Terras kritikon BE-në për këngën nacionaliste serbe në Bruksel: Provokim i qëllimshëm ose injorancë e pastër
Vdekje në vendin e punës në Istog, Prokuroria nis hetimet
Sveçla: Fabrika e municionit, dëshmi e partneritetit strategjik Kosovë–Turqi
118 vjet nga Kongresi i Manastirit, 22 Nëntori shënon bashkimin e shqiptarëve përmes alfabetit
Ukraina dyshohet për sulmin me dron ndaj anijes ruse në Gjirin e Finlandës