Nëntë të arrestuar në Zubin Potok për krime lufte – operacioni lidhet me rastin “Grupi i intelektualëve”

Zubin Potok, 27 shtator 2026 09:37

Nëntë persona janë arrestuar të dielën në komunën e Zubin Potokut, nën dyshimin për kryerjen e veprës penale “Krime lufte kundër popullsisë civile”, shkruan Veritasinfo.

Operacioni është zhvilluar në orët e hershme të mëngjesit nga Policia e Kosovës, përkatësisht Drejtoria për Hetimin e Krimeve të Luftës, me mbështetjen e njësive të tjera të specializuara policore dhe me urdhër të Prokurorisë Speciale të Republikës së Kosovës.

Sipas komunikatës së përbashkët të Prokurorisë Speciale dhe Policisë së Kosovës, operacioni është koduar “Dosja 23” dhe ndërlidhet me rastin e njohur si “Grupi i intelektualëve”.

Autoritetet nuk kanë dhënë ende detaje lidhur me identitetin e personave të arrestuar apo veprimet konkrete për të cilat dyshohen.

Prokuroria Speciale dhe Policia e Kosovës kanë bërë të ditur se për detajet e mëtejshme të operacionit dhe veprimet e ndërmarra do ta informojnë publikun në momentin kur këto informacione mund të bëhen publike.