Gjykimi për sulmin në Ibër-Lepenc, dëshmia e Tiana Viqentijeviqit vazhdon muajin e ardhshëm

Prishtinë, 11 nëntor 2026 15:47

Gjykimi për sulmin ndaj kanalit të Ibër-Lepencit ka vazhduar në Gjykatën Themelore në Prishtinë, ndërsa seanca e radhës është caktuar për 17 dhjetor, kur pritet të vazhdojë dëgjimi i dëshmitares Tiana Viqentijeviq.

Në seancën e së mërkurës, në fokus ishte edhe ndryshimi i përbërjes së trupit gjykues, pas pensionimit të gjyqtarit Vesel Ismaili.

Kryesues i ri i trupit gjykues është caktuar gjyqtari Leon Perlaska, ndërsa anëtarë janë gjyqtarët Kujtim Krasniqi dhe Lutfi Shala.

Në fillim të seancës, prokurori i rastit, Bekim Kodrali, deklaroi se mbetet plotësisht pranë fjalës hyrëse. Të njëjtin qëndrim e paraqitën edhe përfaqësuesja e ndërmarrjes Ibër-Lepenc, si palë e dëmtuar, si dhe avokatët mbrojtës dhe të akuzuarit, të cilët konfirmuan se qëndrojnë pranë deklarimeve hyrëse të 9 korrikut 2026.

Kryesuesi i trupit gjykues njoftoi se për seancën e sotme nuk ishte ftuar asnjë dëshmitar, ndërsa bëri të ditur se kanë mbetur edhe disa propozime të mbrojtjes për t’u shqyrtuar nga gjykata.

Në seancën e ardhshme pritet të vazhdojë dëgjimi i dëshmitares Tiana Viqentijeviq, e cila në seancën paraprake kishte deklaruar se ditën e sulmit e kishte parë Jovan Viqentijeviqin në shtëpi, para se ai të nisej për në punë.

Seanca e radhës është caktuar për 17 dhjetor.