Eksperti Gecaj: FSK-ja duhet të investojë në mbrojtjen kundërajrore dhe teknologjinë ushtarake

Prishtinë, 11 nëntor 2026 13:48

Rritja e buxhetit të mbrojtjes në 224 milionë euro për vitin 2027 është një hap i rëndësishëm për forcimin e kapaciteteve të Forcës së Sigurisë së Kosovës (FSK), por suksesi i këtij investimi duhet të matet me aftësitë konkrete mbrojtëse që do të krijohen.

Kështu vlerëson eksperti i sigurisë Hysen Gecaj, në një prononcim për Veritasinfo, sipas të cilit modernizimi i ushtrisë nuk mund të mbështetet vetëm në blerjen e armatimit dhe pajisjeve moderne, por kërkon edhe personel të përgatitur, disiplinë, koordinim dhe profesionalizëm.

Ai thekson se FSK-ja duhet të vazhdojë procesin e profesionalizimit përmes trajnimeve të specializuara, ushtrimeve të përbashkëta dhe shkëmbimit të përvojave me ushtritë e vendeve anëtare të NATO-s.

Gecaj e veçon bashkëpunimin me Kroacinë si një mundësi të rëndësishme për pjesëtarët e FSK-së që të përfitojnë nga përvoja e ushtrive partnere, të harmonizojnë procedurat dhe të përvetësojnë standarde të avancuara ushtarake.

Duke komentuar rritjen e buxhetit të mbrojtjes, Gecaj thotë se shuma prej 224 milionë eurosh duhet të vlerësohet në raport me objektivat strategjike dhe nevojat reale të FSK-së.

Sipas tij, prioritet duhet të jenë sistemet moderne të armatimit, pajisjet taktike, mbrojtja kundërajrore, teknologjia ushtarake, infrastruktura dhe përgatitja profesionale e personelit.

“224 milionë euro janë një hap i rëndësishëm, por duhet pyetur nëse kjo shumë është e mjaftueshme për realizimin e të gjitha objektivave strategjike të transformimit të FSK-së”, vlerëson Gecaj.

Ai nënvizon se mbrojtja e shtetit kërkon planifikim serioz, investime të mençura, transparencë dhe realizim të projekteve brenda afateve të parapara.

“Kosovës nuk i duhet vetëm një ushtri më e madhe, por një ushtri moderne, profesionale, mirë e pajisur dhe me kapacitete reale mbrojtëse”, thekson Gecaj.

Sipas tij, forcimi i FSK-së është i rëndësishëm jo vetëm për mbrojtjen e sovranitetit dhe integritetit territorial të Kosovës, por edhe për kontributin e vendit në sigurinë dhe stabilitetin rajonal.