Dosja 23: Mësohen emrat e nëntë serbëve të arrestuar për krime lufte në Zubin Potok

Zubin Potok, 27 shtator 2026 12:35

Policia e Kosovës ka arrestuar sot nëntë persona në komunën e Zubin Potokut, të dyshuar për përfshirje në krime lufte kundër popullsisë civile gjatë luftës së fundit në Kosovë.

Arrestimet janë realizuar në orët e hershme të mëngjesit, në kuadër të operacionit të koduar “Dosja 23”, i cili është zhvilluar nga Drejtoria për Hetimin e Krimeve të Luftës, në mbështetje të njësive të tjera të specializuara policore dhe me urdhër të Prokurorisë Speciale të Republikës së Kosovës.

Sipas njoftimit zyrtar, operacioni lidhet me rastin e njohur si “Grupi i Intelektualëve”, ndërsa nëntë personat dyshohen për veprën penale “Krime lufte kundër popullsisë civile”.

Sipas informacioneve të siguruara nga Veritasinfo, personat e arrestuar janë:

Milan Gjuriq

Radisav Rashkoviq

Petar Utviq

Dragan Gjuriq

Vukadin Lepoviq

Jovica Mutavçiq

Svetisllav Gjukiq

Miroslav Radojeviq

Milosh Rashkoviq

Rasti lidhet me “Grupin e Intelektualëve të Mitrovicës”, i përbërë nga 23 persona, të cilët ishin zhdukur gjatë luftës në Kosovë në vitin 1999.

Në kuadër të hetimeve për këtë rast, gjatë gërmimeve në lokacionet Kalludër dhe Jabukë, të zhvilluara nga 27 korriku deri më 21 gusht, janë gjetur mbetje mortore që dyshohet se u përkasin 23 personave të këtij grupi.

“Grupi i Intelektualëve” përbëhej nga profesionistë të ndryshëm, përfshirë mjekë, profesorë, avokatë dhe persona të tjerë nga rajoni i Mitrovicës, të cilët ishin zhdukur në prill të vitit 1999.

Prokuroria Speciale dhe Policia e Kosovës kanë bërë të ditur se detajet e tjera lidhur me operacionin dhe veprimet e ndërmarra do të bëhen publike në momentin kur informacioni mund të publikohet.

Hetimet për rastin janë në zhvillim.