Ministria e Kulturës ndan afro 200 mijë euro për restaurimin e Përmendores së Minatorëve në Mitrovicë

Mitrovicë, 2 nëntor 2026 08:34

Ministria e Kulturës planifikon të investojë deri në 195 mijë e 195 euro për restaurimin dhe mbrojtjen e Përmendores së Minatorëve në Mitrovicë.

Për këtë projekt, Ministria ka hapur një tender përmes të cilit synon të angazhojë një kompani për realizimin e punimeve, ndërsa afati për aplikim është deri më 19 nëntor.

Sipas dosjes së tenderit, ndërhyrjet nuk do të kufizohen vetëm në pastrimin e monumentit dhe largimin e grafiteve, por do të përfshijnë edhe sanimin e pjesëve të dëmtuara të betonit, hidroizolimin e kulmit dhe mbrojtjen e strukturës nga ndikimet atmosferike.

Projekti parasheh gjithashtu restaurimin e platformës vrojtuese, vendosjen e një gardhi të ri mbrojtës dhe instalimin e ndriçimit të ri LED.

Një nga investimet e rëndësishme është edhe vendosja e sistemit të ri të video-mbikëqyrjes, i cili do të integrohet në rrjetin e monitorimit të Policisë së Kosovës. Sistemi do të mundësojë vëzhgimin e monumentit 24 orë në ditë.