Çështja e shqiptarëve të Luginës së Preshevës ngrihet para kongresistit amerikan

Preshevë, 21 shtator 2026 13:45

Çështja e shqiptarëve të Luginës së Preshevës është ngritur në një takim në New York ndërmjet deputetit shqiptar Shaip Kamberi dhe kongresistit amerikan Mike Lawler, anëtar i Komisionit për Punë të Jashtme të Dhomës së Përfaqësuesve, shnruan Veritasinfo.

Kamberi, i cili ishte pjesë e delegacionit të Kryeministrit të Kosovës, Albin Kurti, bëri të ditur se në takimin me kongresistin amerikan është diskutuar për gjendjen e shqiptarëve në Preshevë, Bujanoc dhe Medvegjë.

Përfshirja e Luginës së Preshevës në një takim me një anëtar të Komisionit për Punë të Jashtme të Kongresit amerikan paraqet një përpjekje për ta mbajtur çështjen e të drejtave të shqiptarëve të kësaj treve në vëmendjen e institucioneve ndërkombëtare dhe politikëbërësve amerikanë.

Kamberi tha se shqiptarët në Preshevë, Bujanoc e Medvegjë vazhdojnë të përballen me diskriminim institucional, ndërsa përfaqësimi i tyre në institucionet publike, sipas tij, mbetet shumë larg përfaqësimit në raport me përbërjen e popullsisë.

Në takim është diskutuar edhe çështja e pasivizimit të adresave, që sipas Kamberit prek mijëra shqiptarë dhe ka pasoja të drejtpërdrejta në të drejtën e votës dhe në pajisjen me dokumente identifikimi.

Kamberi tha se me kongresistin Lawler është biseduar edhe për mënyrat e adresimit të kësaj çështjeje, duke e vënë theksin te nevoja që shqetësimet e shqiptarëve të Luginës së Preshevës të trajtohen edhe në komunikimet me institucionet ndërkombëtare.

Takimi në New York vjen në kuadër të aktiviteteve të delegacionit të Kosovës dhe e vendos çështjen e Luginës së Preshevës në agjendën e diskutimeve me përfaqësues të institucioneve amerikane.