Investimi në Kamenicë përmirëson infrastrukturën rrugore

Prishtinë, 7 korrik 2026 08:51

Punimet për ndërtimin e rrugës Shipashnicë–Desivojcë–Tërstenë, në Komunën e Kamenicës, po vazhdojnë sipas planit dinamik, ka bërë të ditur Ministria e Infrastrukturës dhe Transportit.

Sipas ministrisë, ekipet në terren po realizojnë me intensitet fazat e radhës të projektit, i cili synon të përmirësojë infrastrukturën rrugore në këtë pjesë të vendit.

Ministria thekson se investimi pritet të ndikojë në rritjen e sigurisë në komunikacion, lehtësimin e qarkullimit të qytetarëve, si dhe krijimin e kushteve më të favorshme për zhvillimin ekonomik dhe social të lokaliteteve që përshkon kjo rrugë.

Tutje, Ministria e Infrastrukturës dhe Transportit ka ritheksuar përkushtimin për zbatimin e projekteve që modernizojnë rrjetin rrugor në Kosovë dhe ofrojnë infrastrukturë më cilësore për qytetarët.