Mbështetja e Gjermanisë është kyçe për anëtarësimin e Kosovës në BE

Prishtinë, 2 korrik 2026 19:15

Kryenegociatori i Republikës së Kosovës me Bashkimin Evropian, Jeton Zulfaj, ka pritur të enjten në takim ambasadorin e Republikës Federale të Gjermanisë në Kosovë, Rainer Rudolph.

Gjatë takimit, Zulfaj ka theksuar rëndësinë e marrjes së statusit të vendit kandidat dhe hapjes së negociatave për anëtarësim në Bashkimin Evropian.

Ai ka nënvizuar se për Kosovën anëtarësimi në BE nuk është vetëm një akt formal, por një proces transformues që forcon demokracinë, nxit zhvillimin ekonomik dhe rrit mirëqenien e qytetarëve.

“Kosova është e interesuar dhe e investuar plotësisht në këtë proces, ndërsa mbështetja e Gjermanisë është e rëndësishme për ta çuar atë përpara”, ka deklaruar Zulfaj.

Kryenegociatori e ka falënderuar ambasadorin Rudolph për mbështetjen e vazhdueshme të Gjermanisë ndaj Kosovës, duke theksuar se marrëdhëniet ndërmjet dy vendeve bazohen në vlera të përbashkëta dhe forcohen edhe nga kontributi i mërgatës kosovare në Gjermani.

Zulfaj ka vlerësuar gjithashtu rolin e Gjermanisë në procesin e zgjerimit të Bashkimit Evropian dhe në integrimin ekonomik të rajonit përmes Procesit të Berlinit.

Sipas njoftimit, në takim është diskutuar edhe ecuria e reformave që Kosova po zbaton në kuadër të Planit të Rritjes.