Diskriminimi i shqiptarëve në Luginë, raporti i OKB-së konfirmon akuzat e Shaip Kamberit

Prishtinë, 5 maj 2026 07:20

Raporti më i fundit i Komitetit për Eliminimin e Diskriminimit Racor pranë Organizatës së Kombeve të Bashkuara ka rikthyer në fokus ndërkombëtar pozitën e shqiptarëve në Luginën e Preshevës, duke evidentuar një sërë shkeljesh dhe sfidash që vazhdojnë të prekin shqiptarët në Luginën e Preshevës.

Në lidhje me këto gjetje ka reaguar edhe deputeti shqiptar në Parlamentin e Serbisë, Shaip Kamberi, i cili ka theksuar se raporti konfirmon shqetësimet e ngritura prej kohësh për diskriminimin sistematik ndaj shqiptarëve në këtë rajon, përcjell Veritasinfo.

Sipas raportit, problemet kryesore përfshijnë gjuhën e urrejtjes ndaj pakicës shqiptare, përfaqësimin e pamjaftueshëm në institucionet shtetërore, si dhe zbatimin diskriminues të ligjit për vendbanimin.

Ky i fundit, sipas gjetjeve, ka çuar në pasivizimin e adresave të shumë qytetarëve shqiptarë, duke u mohuar atyre të drejta themelore civile dhe politike.

Kamberi ka vlerësuar se këto konstatime nuk janë thjesht vlerësime teknike, por pasqyrojnë realitetin e përditshëm të shqiptarëve në Luginën e Preshevës.

Ai ka bërë thirrje që institucionet përgjegjëse të reagojnë me masa konkrete, në përputhje me standardet ndërkombëtare dhe obligimet që rrjedhin nga konventat për të drejtat e njeriut.

Raporti i Komitetit për Eliminimin e Diskriminimit Racor nënvizon se respektimi i të drejtave të pakicave nuk është çështje zgjedhjeje politike, por një detyrim ndërkombëtar dhe bazë themelore për ndërtimin e një shoqërie demokratike.