Akordet e Kosovës” gati për tri net muzikore, në skenë edhe talentet e rinj

Prishtinë, 27 tetor 2026 08:53

Festivali i Këngës “Akordet e Kosovës” është gati për edicionin e katërt, i cili këtë vit do të sjellë tri net me muzikë, artistë të njohur dhe talente të reja, duke i kushtuar vëmendje të veçantë edhe trashëgimisë muzikore të Kosovës.

Festivali do të mbahet më 30 dhe 31 tetor, si dhe më 1 nëntor, në Sallën e Sporteve “1 Tetori” në Prishtinë. Dy netët e para do t’i kushtohen muzikës moderne, ndërsa nata e tretë do të jetë e dedikuar për fëmijët.

Drejtori artistik i festivalit, Florent Boshnjaku, ka thënë se rikthimi i emrit “Akordet e Kosovës” synon të nderojë historinë muzikore dhe artistët që kanë kontribuar ndër vite në zhvillimin e saj.

Ai ka theksuar se një nga risitë e këtij edicioni është përfshirja e fëmijëve, të cilët do të kenë mundësi të interpretojnë drejtpërdrejt në një skenë profesionale, të shoqëruar nga orkestra dhe mekanizmat e Radiotelevizionit të Kosovës.

Edhe drejtoresha e festivalit, Arta Avdiu, ka vlerësuar se tri netët do të përcjellin mesazhin e lidhjes mes së kaluarës, së tashmes dhe së ardhmes së muzikës shqiptare.

Përmes këtij edicioni, organizatorët synojnë të ndërthurin traditën me krijimtarinë bashkëkohore, duke krijuar hapësirë për artistët e afirmuar dhe për gjeneratat e reja.

“Akordet e Kosovës” kanë një histori të gjatë në skenën muzikore të vendit. Festivali i parë u mbajt në vitin 1963 në Zveçan, ndërsa rikthimi i emrit synon të ruajë këtë trashëgimi dhe ta përcjellë atë te brezat e rinj.