Koeficienti i pagave pritet të rritet në 120 euro nga korriku i vitit 2027, paralajmëron Kurti

Prishtinë, 2 nëntor 2026 16:49

Kryeministri i Kosovës në mandat teknik, Albin Kurti, ka paralajmëruar rritjen e vlerës së koeficientit të pagave nga 110 në 120 euro, duke filluar nga 1 korriku i vitit 2027.

Gjatë mbledhjes së nëntë të Qeverisë, Kurti ka bërë të ditur se Projektbuxheti për vitin 2027 parasheh edhe ekzekutimin e pagës së 13-të për nëpunësit publikë, e cila pritet të jepet në pjesën e parë të vitit.

“Buxheti i 2027 parasheh edhe në vitin tjetër pagën e 13-të, dhe krahas saj edhe rritjen e koeficientit të pagave në 120 euro nga data 1 korrik 2027”, ka deklaruar Kurti.

Sipas tij, buxheti i përgjithshëm për paga do të arrijë në 1 miliard e 85 milionë euro, ndërsa do të përfshijë rreth 85 mijë punonjës të sektorit publik.

Kurti ka thënë se kjo shumë nënkupton një pagë mesatare vjetore bruto mbi 12 mijë euro, apo mbi 1 mijë euro në muaj për punonjësit publikë.