Edhe piloti i dytë i ”F-15”-s së rrëzuar shpëtohet nga ushtria amerikane

Prishtinë, 05.04.2026 08:59

Edhe anëtari i dytë i ekuipazhit të një avioni luftarak amerikan ”F-15”, i rrëzuar mbi Iran është “i sigurt dhe shëndoshë e mirë” pasi u shpëtua nga ushtria, tha sot presidenti Donald Trump në një postim në Truth Social herët në mëngjes.

“Ai pësoi lëndime, por do të jetë mirë”, tha Trump, duke e përshkruar misionin për të rikuperuar anëtarin e shërbimit si “një nga operacionet më të guximshme të kërkimit dhe shpëtimit në historinë e SHBA-së”.

Një avion luftarak amerikan F-15E u rrëzua mbi Iranin të premten, duke shkaktuar shqetësim të madh në Uashington se forcat iraniane mund të kapnin të dy anëtarët e ekuipazhit dhe t’i përdornin si levë në negociatat për t’i dhënë fund luftës.

Trump konfirmoi se piloti i parë i avionit ishte shpëtuar më parë, duke vënë në dukje se SHBA-të fillimisht nuk e kishin zbuluar këtë për të shmangur rrezikimin e operacionit të dytë të shpëtimit.

Sipas raporteve të medias, forcat speciale amerikane u vendosën në Iranin jugor pjesërisht për të parandaluar kapjen e anëtarit të dytë të ekuipazhit, një oficer armatimesh.

Media iraniane raportoi se shuma të mëdha parash, thuhet se deri në 100 000 dollarë, ishin ofruar për kapjen e tij.

Trump tha se ushtria amerikane kishte vendosur “dhjetëra avionë, të armatosur me armët më vdekjeprurëse në botë, për ta rikuperuar atë”.