Trumpi i vë ultimatum Iranit

Prishtinë 04 Prill 2026 17:21

Presidenti i Shteteve të Bashkuara të Amerikës, Donald Trump, ka kërcënuar Iranin se i ka 48 orë afat për të arritur marrëveshje ose ta hapë Ngushticën e Hormuzit para se “ferri të bjerë mbi ta”.

“Kujtojeni kur ia dhashë Iranit dhjetë ditë për të BËRË MARRËVESHJE ose PËR TA HAPUR NGUSHTICËN E HORMUZIT. Koha po mbaron. 48 orë para se ferri të bjerë mbi ta. Lavdi Zotit. Presidenti Donald Trump”, ka shkruar ai të shtunën në “Truth Social”.

Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.

Më 27 mars, Trumpi pati njoftuar se e ka zgjatur për 10 ditë afatin që Irani ta hapë ngushticën e famshme.

Si pasojë e mbylljes së kësaj ngushtice, bota po përballet me çmime më të larta të derivateve. Ngushtica e Hormuzit shërben si rrugë për 20 për qind të eksporteve të naftës.

Më 28 shkurt, nisi lufta në Iran me sulmet e SHBA-së dhe të Izraelit. Nga ajo kohë, Irani u përgjigj me sulme ndaj Izraelit dhe bazave amerikane në Lindjen e Mesme.

S’është hera e parë që Trumpi ka vendosur ultimatume ndaj Iranit.

Më 21 mars ai pati thënë se nëse Hormuzi s’hapet për 48 orë, Irani do të përballet me goditje të mëdha në termocentrale.

Dy ditë më pas kishte thënë se ka pasur biseda konstruktive e se ai do të shtyjë çdo sulm mbi infrastrukturën energjetike për pesë ditë.

Më 27 mars, Trumpi pezulloi për 10 ditë sulmet ndaj centraleve energjetike, në përgjigje të asaj që tha ishte kërkesë e Qeverisë së Iranit. Pra afati ishte deri më 6 prill.

Sot ai ka përsëritur këtë afat, duke thënë se kanë mbetur edhe 48 orë.