Konjufca: Shpifjet që e ofendojnë në palcë luftën çlirimtare, do të dështojnë

Prishtinë, 10 shkurt 2026 18:20

Nënkryetari i Lëvizjes Vetëvendosje, Glauk Konjufca, pret që akuzat në Dhomat e Specializuara në Hagë, ndaj krerëve të UÇK-së të dështojnë, sepse, sipas tij, janë shpifje që e ofendojnë në palcë luftën e UÇK-së.

Konjufca pret që drejtuesit e UÇK-së të dalin të pafajshëm.

“Shpresoj që të gjithë ata që po gjykohen në Hagë do të dalin të pafajshëm. “Nuk kanë bërë krime, kanë qenë në krye të një ushtrie, e cila është çlirimtare, ka dhënë dëshmorët e saj. Kushdo që mundohet ta ndryshojë këtë vërtetë do të humbë dhe shpresoj që të gjithë ata që po gjykohen në Hagë do të dalin të pafajshëm”, tha Konjufca.

Ai bëri të ditur se ka aplikuar që të jetë në ditën përfundimtare në Hagë.

“Prapë do të shkoj në Hagë, do të jem aty në ditën përfundimtare, kam aplikuar me qenë atje dhe do të përfaqësoj popullin e Kosovës në atë proces… Pres që ky proces, këto akuza të dështojnë. Janë të paqëndrueshme, shpifje, gënjeshtra që e ofendojnë në palcë luftën tonë çlirimtare dhe pikërisht se do të dështojnë mendoj se Thaçi, Veseli, Krasniqi dhe Selimi do të dalin të pafajshëm”, tha Konjufca.