FSK përgatit instruktorët për sfidat e luftës moderne

Prishtinë, 2 tetor 2026 15:13

Forca e Sigurisë së Kosovës (FSK) ka realizuar trajnimin “Train the Trainers”, me fokus në të Drejtën Ndërkombëtare Humanitare (IHL), i cili u dedikua instruktorëve të kësaj force.

Trajnimi u zhvillua në Kazermën “Adem Jashari” në Prishtinë dhe u hap nga gjeneral brigade Astrit Haliti dhe drejtori i NALT-it, gjeneral Thomas Schulte-Borghoff.

Aktiviteti u organizua në bashkëpunim ndërmjet NALT-it dhe Komitetit Ndërkombëtar të Kryqit të Kuq, ndërsa ligjëratat dhe sesionet praktike u udhëhoqën nga përfaqësues të KNKK-së dhe NALT-it.

Gjatë trajnimit, instruktorët e FSK-së trajtuan një sërë çështjesh që lidhen me zbatimin e së Drejtës Ndërkombëtare Humanitare gjatë operacioneve ushtarake.

Në fokus ishin zhvillimi dhe planifikimi i operacioneve, sjellja gjatë armiqësive, pjesëmarrja e drejtpërdrejtë në luftime, operacionet urbane, përzgjedhja e objektivave, teknologjitë e reja të luftës dhe përgjegjësitë komanduese.

Po ashtu, pjesëmarrësit diskutuan për mënyrën e integrimit të parimeve të së Drejtës Ndërkombëtare Humanitare në procedurat dhe doktrinat ushtarake.

Sipas organizatorëve, qëllimi i trajnimit ishte forcimi i kapaciteteve të instruktorëve të FSK-së për të përcjellë njohuritë dhe parimet e së Drejtës Ndërkombëtare Humanitare në kuadër të institucioneve të edukimit dhe trajnimit.

Trajnimi synon të kontribuojë edhe në zhvillimin e mëtejshëm profesional të personelit të FSK-së dhe në zbatimin e standardeve ndërkombëtare në fushën e mbrojtjes dhe sigurisë.