53 të akuzuar për krime lufte në Gjakovë dalin sot para gjykatës

Prishtinë, 25 shtator 2026 09:48

53 persona të akuzuar për krime lufte të kryera gjatë viteve 1998-1999 në disa fshatra të Komunës së Gjakovës do të dalin sot para Gjykatës Themelore në Prishtinë.

Të gjithë të pandehurit vazhdojnë të jenë në arrati, ndërsa në sallën e gjyqit ndodhen 53 avokatë mbrojtës, të caktuar për përfaqësimin e tyre në këtë proces gjyqësor.

Prokuroria Speciale e Republikës së Kosovës kishte ngritur aktakuzë në mungesë ndaj 53 personave në dhjetor të vitit 2023, ndërsa aktakuza ishte ndryshuar më 23 dhjetor 2024.

Gjykata e Apelit, me vendimin e 25 majit 2026, e kishte kthyer në rivendosje vendimin e Gjykatës Themelore në Prishtinë, përmes të cilit ishte konfirmuar aktakuza e Prokurorisë Speciale.

Sipas aktakuzës, të pandehurit dyshohen se gjatë viteve 1998-1999, në fshatrat e Komunës së Gjakovës, duke vepruar në bashkëkryerje dhe si pjesë e një ndërmarrjeje të përbashkët kriminale, kanë kryer veprat penale për të cilat akuzohen.

Në mesin e të akuzuarve janë edhe ish-zyrtarë të lartë të strukturave ushtarake, policore dhe të sigurisë serbe të asaj kohe.

Meqë të gjithë të akuzuarit ndodhen jashtë Kosovës, procesi po zhvillohet në mungesë të tyre dhe ata përfaqësohen nga avokatët e caktuar për mbrojtjen e tyre.