Kurti fton diasporën në Francë të investojë në Kosovë

Prishtinë, 9 nëntor 2026 10:23

Kryeministri i Kosovës, Albin Kurti, ka ftuar pjesëtarët e diasporës shqiptare në Francë që të rrisin investimet në Kosovë, duke prezantuar mekanizmat qeveritarë për mbështetjen e ndërmarrësve nga mërgata.

Gjatë një takimi me përfaqësues të diasporës shqiptare në Francë, Kurti ka diskutuar për mundësitë e përfshirjes më të madhe të mërgatës në jetën publike, institucionale dhe ekonomike të vendit.

Ai ka theksuar se diaspora përbën një potencial të rëndësishëm për zhvillimin e Kosovës, jo vetëm përmes investimeve financiare, por edhe duke sjellë përvojën profesionale, ekspertizën dhe kulturën e punës nga vendet e zhvilluara.

Kurti ka bërë të ditur se përmes mekanizmit “Dritarja për Investime të Diasporës”, ndërmarrësit nga mërgata që dëshirojnë të investojnë në Kosovë do të kenë mbështetje financiare, ndërsa shteti do të garantojë kreditë deri në 80 për qind.

“Kësisoj mërgata lëvizë drejt kapërcimit nga sakrifica për të kontribuuar në investim për të fituar”, ka deklaruar Kurti.

Krahas këtij mekanizmi, ai ka përmendur edhe Programin 1 Miliard Euro për Prodhim dhe Industri, përmes të cilit synohet mbështetja e projekteve strategjike dhe prioritare në sektorin industrial.

Takimi me përfaqësuesit e diasporës shqiptare u zhvillua të dielën, gjatë vizitës zyrtare të Kurtit në Francë, para pjesëmarrjes së tij në Forumin e Paqes në Paris.