Jashari kërkon anëtarësimin e plotë të Kosovës në Kartën e Adriatikut A5

Prishtinë, 19 shtator 2026 14:39

Komandanti i Forcës së Sigurisë së Kosovës (FSK), gjenerallejtënant Bashkim Jashari, mori pjesë në punimet e konferencës së Kartës së Adriatikut A5, e cila këtë vit u mbajt në Zadar të Kroacisë, me pjesëmarrjen e shefave të mbrojtjes nga vendet e Ballkanit Perëndimor.

Konferenca u zhvillua nën drejtimin e Komandantit të Komandës Amerikane për Evropë (EUCOM), gjeneral Alexus G. Grynkewich, në bashkëpunim me Forcat e Armatosura të Kroacisë. Në fokus të diskutimeve ishin sfidat aktuale gjeopolitike, siguria rajonale dhe nevoja për forcimin e bashkëpunimit ndërmjet vendeve të Ballkanit Perëndimor, shkruan Veritasinfo.

Gjatë punimeve të konferencës, theksi u vu në rëndësinë e bashkëpunimit rajonal si një faktor për stabilitetin afatgjatë dhe ruajtjen e paqes në rajon.

Në kuadër të vizitës, gjenerallejtënant Jashari zhvilloi edhe takime dypalëshe me zyrtarë të lartë ushtarakë ndërkombëtarë. Ai u takua me Komandantin e EUCOM-it, gjeneral Alexus G. Grynkewich, si dhe me Zëvendëskomandantin e Komandës së Forcave të Përbashkëta Aleate në Napoli (JFC Naples), gjeneral Peter K. Scot.

Sipas njoftimit, në këto takime u diskutua për thellimin e ndërveprueshmërisë ndërmjet forcave, koordinimin operacional dhe mbështetjen strategjike të aleatëve euroatlantikë për zhvillimin e kapaciteteve të mbrojtjes.

Jashari zhvilloi takim edhe me komandantin e Gardës Kombëtare të Ajovas, gjeneralmajor Stephen Osborn. Në fokus të këtij takimi ishte rritja e bashkëpunimit dhe forcimi i partneritetit ndërmjet FSK-së dhe Gardës Kombëtare të Ajovas.

Në fjalën e tij në konferencë, komandanti i FSK-së prezantoi vizionin e Kosovës për të ardhmen e sigurisë rajonale dhe bëri kërkesë zyrtare për anëtarësimin e Kosovës me të drejta të plota në Kartën e Adriatikut A5.

Jashari theksoi se, sipas vlerësimit të Kosovës, tranzicioni i FSK-së dhe gatishmëria e saj për të kontribuar në misione ndërkombëtare e pozicionojnë vendin si partner në bashkëpunimin euroatlantik dhe si pjesëmarrës potencial në strukturat dhe iniciativat rajonale të sigurisë.