Maqedonci në konferencën e sigurisë në Berlin, në fokus kërcënimi nga Rusia

Prishtinë, 3 nëntor 2026 16:41

Ministri i Mbrojtjes i Kosovës, Ejup Maqedonci, ka marrë pjesë në Konferencën e Sigurisë në Berlin (Berlin Security Conference), ku është ftuar si panelist në një debat të nivelit të lartë për sfidat e sigurisë evropiane dhe parandalimin e ndërhyrjeve ruse.

Përmes një postimi, Maqedonci ka bërë të ditur se debati kishte temën “Parandalimi përmes vigjilencës: Si të frenohet ndërhyrja ruse”, ku morën pjesë edhe përfaqësues të lartë të NATO-s dhe Gjermanisë.

Gjatë diskutimit u trajtuan kërcënimet që burojnë nga ndërhyrjet dhe ndikimi rus, sfidat aktuale të sigurisë në Evropë, si dhe rëndësia e forcimit të bashkëpunimit ndërmjet aleatëve dhe partnerëve për ruajtjen e paqes dhe stabilitetit.

Sipas Maqedoncit, Republika e Kosovës mbetet e përkushtuar në forcimin e kapaciteteve të saj mbrojtëse dhe në dhënien e kontributit aktiv për sigurinë rajonale dhe ndërkombëtare, në bashkëpunim të ngushtë me partnerët strategjikë.

Konferenca e Sigurisë në Berlin, e cila mbahet më 3 dhe 4 nëntor, mbledh përfaqësues politikë, diplomatikë, ushtarakë dhe ekspertë të sigurisë nga vende të ndryshme për të diskutuar zhvillimet dhe sfidat në fushën e mbrojtjes dhe sigurisë.