209 rekrutë të rinj nisin stërvitjen ushtarake në FSK

Prishtinë, 26 tetor 2026 21:15

Vetëm pak ditë pasi 515 të rinj dhe të reja dhanë betimin solemn dhe iu bashkuan radhëve të Forcës së Sigurisë së Kosovës, edhe 209 rekrutë të rinj kanë nisur stërvitjen ushtarake bazë.

Stërvitja po zhvillohet në Komandën e Doktrinës dhe Stërvitjes, ku rekrutët do të marrin njohuritë dhe shkathtësitë themelore ushtarake, me synim përgatitjen e tyre për t’i shërbyer mbrojtjes dhe sigurisë së Republikës së Kosovës, ka njoftuar ministri i Mbrojtjes, Ejup Maqedonci.

Përmes rekrutimeve të vazhdueshme, shkollimit dhe trajnimeve profesionale, institucionet synojnë të krijojnë mundësi për gjeneratat e reja që të zhvillohen në aspektin profesional dhe të kontribuojnë në forcimin e kapaciteteve të FSK-së.

Krahas investimeve në armatim dhe pajisje moderne, theksi është vendosur edhe në përgatitjen profesionale të personelit, duke e konsideruar fuqizimin e burimeve njerëzore si një nga shtyllat kryesore të një force të aftë dhe të gatshme për përballimin e sfidave të së ardhmes.