Rrjeti i BIA-s për SNS-në: Mbledhje votash dhe evidentim i kundërshtarëve në Kosovë

Prishtinë, 4 nëntor 2026 12:54

Audioincizimi i Fehim Salit në Kosovë dhe kallëzimi penal ndaj drejtorit të Agjencisë së Inteligjencës së Serbisë (BIA), Vladimir Orliq, në Serbi, nxjerrin në pah pretendimet për përfshirjen e inteligjencës serbe në mbledhjen e votave për Partinë Progresive Serbe (SNS).

Kështu vlerëson profesori Gurakuç Kuçi, i cili thotë se të dy rastet tregojnë lidhjen mes organizimit elektoral dhe strukturave të inteligjencës, duke ngritur shqetësime për grumbullimin e të dhënave politike dhe përdorimin e tyre për presion e ndikim në Kosovë.

Në audioincizimin e publikuar më 4 shtator 2026, Fehim Sali dëgjohet duke komunikuar me Zhelimir Matoviqin, të identifikuar nga Prokuroria Speciale e Kosovës si zyrtar i BIA-s. Gjatë bisedës, Sali shpjegon mbledhjen e nënshkrimeve për SNS-në në mesin e komunitetit goran, duke përmendur edhe evidentimin e personave që kishin refuzuar ta mbështesnin këtë parti.

Sipas Kuçit, përcjellja e këtyre informacioneve te një zyrtar i inteligjencës së huaj e tejkalon organizimin e zakonshëm partiak, pasi mundëson identifikimin e qëndrimeve politike dhe krijon hapësirë për ushtrim presioni ndaj qytetarëve.

Në këtë rast përmendet edhe një shoqatë, e regjistruar në Serbi më 2 prill 2024, ku Sali figuron si përfaqësues. Organizata është lidhur me raportimet për mobilizimin e mbështetjes së komunitetit goran për SNS-në.

Kallëzimi penal ndaj drejtorit të BIA-s
Më 2 nëntor 2026, avokati Ivan Niniq paraqiti kallëzim penal në Prokurorinë për Krimin e Organizuar në Beograd kundër drejtorit të BIA-s, Vladimir Orliq, dhe shtatë drejtuesve të tjerë të agjencisë.

Sipas kallëzimit, punonjësve të BIA-s në disa qytete të Serbisë u ishte imponuar mbledhja e të ashtuquajturave “vota kapilare” për SNS-në, përmes formularëve partiakë dhe autoritetit të eprorëve.

Orliq, para emërimit në krye të BIA-s në qershor 2024, kishte qenë funksionar i lartë i SNS-së dhe kryetar i Kuvendit të Serbisë.

Kallëzimi u bë publik pas zgjedhjeve parlamentare të 25 tetorit në Serbi. Ndërkaq, ODIHR, në vlerësimin e 26 tetorit, evidentoi keqpërdorimin e burimeve shtetërore dhe presionet gjatë procesit zgjedhor.

Shqetësimet për sigurinë e Kosovës
Duke i ndërlidhur të dy rastet, Kuçi vlerëson se përfshirja e pretenduar e BIA-s në mbledhjen e votave për SNS-në ngre çështje që shkojnë përtej organizimit elektoral.

Sipas tij, mbledhja e të dhënave për qytetarët që mbështesin ose refuzojnë SNS-në dhe raportimi i tyre te zyrtarët e inteligjencës serbe krijojnë mundësi për profilizim politik, presion dhe zgjerim të rrjeteve të ndikimit në Kosovë.

Kuçi thekson se institucionet e Kosovës duhet të hetojnë personat e përfshirë, mënyrën e përcjelljes së listave dhe lidhjet e tyre me strukturat e BIA-s, për të zbardhur përdorimin e mundshëm të këtyre informacioneve për ndikim politik.