Kryeministri Kurti udhëton në SHBA, në agjendë takime me liderë ndërkombëtarë

Prishtinë, 19 shtator 2026 10:08

Kryeministri i Kosovës, Albin Kurti, ka udhëtuar të premten drejt New Yorkut, ku do të marrë pjesë në aktivitetet e Javës së Nivelit të Lartë të Sesionit të 81-të të Asamblesë së Përgjithshme të Kombeve të Bashkuara.

Sipas njoftimit të Qeverisë së Kosovës, gjatë qëndrimit në Shtetet e Bashkuara, Kurti do të zhvillojë takime bilaterale me liderë botërorë, me fokus në promovimin dhe forcimin e vlerave dhe interesave shtetërore të Kosovës në arenën ndërkombëtare.

Në kuadër të vizitës, kryeministri pritet të zhvillojë takime edhe me pjesëtarë të komunitetit shqiptar në SHBA, përfaqësues të shoqatave të diasporës dhe investitorë potencialë në ekonominë e Kosovës.

Qëndrimi i Kurtit në New York përkon me aktivitetet e nivelit të lartë të Kombeve të Bashkuara, ku gjatë kësaj periudhe zhvillohen takime dhe kontakte të shumta ndërmjet liderëve dhe përfaqësuesve të shteteve të ndryshme.