Përgatitje e avancuar për pjesëtarët e FSK-së në qitje precize

Prishtinë, 18 shtator 2026 18:21

Forca e Sigurisë së Kosovës ka realizuar Kursin e Avancuar për Snajper, në kuadër të përpjekjeve për zhvillimin dhe avancimin e kapaciteteve profesionale dhe operacionale të pjesëtarëve të saj.

Sipas FSK-së, kursi është fokusuar në përgatitjen e pjesëtarëve për realizimin e detyrave të vëzhgimit, zbulimit dhe mbledhjes së informacionit në zona me rrezikshmëri të lartë.

Gjatë trajnimit, pjesëmarrësit janë aftësuar dhe vlerësuar në fusha të ndryshme profesionale, përfshirë planifikimin dhe organizimin e misioneve, kalkulimin dhe realizimin e qitjeve, si dhe përdorimin e sistemeve të precizionit SIG Sauer.

Trajnimi ka përfshirë gjithashtu aftësi fushore, si kamuflimi, fshehja dhe lëvizja, si dhe teknikat e përndjekjes dhe vëzhgimit, të njohura si “Stalking”.

Pjesëmarrësit janë trajnuar edhe për identifikimin dhe angazhimin e caqeve, bazuar në prioritetet e përcaktuara në kuadër të misionit.

FSK-ja thekson se përmes trajnimeve të avancuara synon të rrisë profesionalizmin, disiplinën dhe kapacitetet operacionale të pjesëtarëve të saj, në funksion të përmbushjes së misionit dhe standardeve të kërkuara profesionale.