Shala: Institucionet e sigurisë kanë ndërtuar kapacitete të rëndësishme për përballjen me operacionet e inteligjencës së huaj

Prishtinë, 22 gusht 2026 13:37

Institucionet e sigurisë në Kosovë kanë ndërtuar kapacitete të rëndësishme për identifikimin dhe parandalimin e aktiviteteve të shërbimeve të huaja të inteligjencës, ndërsa përballja me operacionet e kundërzbulimit mbetet një nga sfidat kryesore të sigurisë së vendit.

Eksperti i sigurisë, Drizan Shala, vlerëson se efektiviteti i institucioneve të sigurisë në përballjen me operacionet e dyshuara të inteligjencës së huaj nuk duhet të matet vetëm përmes rasteve që bëhen publike, pasi një pjesë e konsiderueshme e punës së kundërzbulimit zhvillohet në mënyrë konfidenciale.

Sipas tij, institucionet e sigurisë kanë dëshmuar kapacitete në identifikimin, përcjelljen dhe neutralizimin e aktiviteteve që lidhen me kërcënimet e jashtme të sigurisë.

“Institucionet e sigurisë kanë dëshmuar kapacitet të konsiderueshëm në identifikimin, përcjelljen dhe neutralizimin e aktiviteteve që lidhen me kërcënimet e jashtme të sigurisë”, thotë Shala për Veritasinfo.

Ai thekson se, në rastet kur bëhet fjalë për operacione të dyshuara të shërbimeve të huaja, suksesi i institucioneve nuk mund të vlerësohet vetëm nga informacionet e publikuara. Sipas tij, rezultatet më të rëndësishme të kundërzbulimit shpesh mbeten jashtë vëmendjes së opinionit publik për shkak të natyrës konfidenciale të këtyre operacioneve.

Në vlerësimin e tij profesional, Shala thotë se institucionet e sigurisë kanë realizuar një seri operacionesh kundër aktiviteteve të lidhura me inteligjencën e huaj.

“Sipas vlerësimit tim profesional, institucionet e sigurisë kanë realizuar një seri operacionesh të suksesshme kundër aktiviteteve të lidhura me inteligjencën e huaj, përfshirë shtatë operacione të suksesshme që kanë kontribuar në identifikimin dhe ndërprerjen e veprimtarisë operative të aktorëve të huaj”, shprehet ai.

Për Shalën, këto raste tregojnë se kapaciteti kundërzbulues i Kosovës nuk është vetëm reaktiv. Ai vlerëson se, në raste të caktuara, institucionet kanë qenë në gjendje të identifikojnë modele të veprimtarisë, persona me interes operacional dhe lidhjet e tyre, duke ndërhyrë para se aktivitetet e dyshuara të prodhojnë pasoja më të mëdha për sigurinë kombëtare.

Në këtë proces, sipas tij, institucionet e sigurisë kanë rol qendror, pasi vetë natyra e kundërzbulimit kërkon identifikimin e aktiviteteve të dyshimta para se ato të bëhen publike dhe para se dëmi i mundshëm të materializohet.

“Institucionet e sigurisë kanë një rol qendror në këtë proces, sepse kundërzbulimi kërkon pikërisht atë që një shërbim inteligjent duhet të bëjë: të zbulojë aktivitetin para se ai të bëhet publik dhe para se dëmi të jetë materializuar”, thekson Shala.

Megjithatë, ai vlerëson se përballja me shërbimet e huaja të inteligjencës nuk është një sfidë statike. Përkundrazi, kërcënimet e sigurisë po marrin forma gjithnjë e më hibride, duke kombinuar inteligjencën njerëzore me ndikimin politik, dezinformimin dhe operacionet psikologjike.

“Institucionet e Kosovës kanë ndërtuar një përvojë të rëndësishme në përballjen me operacionet e inteligjencës së huaj. Sfida tashmë është ruajtja dhe avancimi i këtij kapaciteti, sidomos përballë një kërcënimi që po bëhet gjithnjë e më hibrid”, përfundon eksperti i sigurisë.