Ministri gjerman: Normalizimi Kosovë–Serbi, kyç për stabilitetin në Ballkan

Berlin, 31 korrik 2025

Ministri gjerman i Shtetit për Evropë dhe Punë të Jashtme, Gunther Kirchbaum, u takua të martën në Berlin me emisarin e BE-së për dialogun Kosovë–Serbi, Peter Sorensen.

Pas takimit, Kirchbaum deklaroi se Gjermania mbështet plotësisht dialogun e lehtësuar nga BE-ja për normalizimin e marrëdhënieve ndërmjet Kosovës dhe Serbisë. Ai përgëzoi Sorensenin për përpjekjet dhe theksoi se të dyja palët duhet të zbatojnë marrëveshjet pa vonesa dhe të përmbahen nga deklaratat apo veprimet përshkallëzuese.

“Nxis Kosovën dhe Serbinë të rifillojnë angazhimin e plotë në dialog, të garantojnë lëvizje të lirë dhe të sigurt për ekipet negociuese, dhe të ruajnë maturinë në deklaratat publike. Gjermania është e gatshme të mbështesë një proces të qëndrueshëm e paqësor të normalizimit”, u shpreh ai.

Ministri gjerman theksoi se e ardhmja e Ballkanit Perëndimor është në BE, dhe se dialogu e fqinjësia e mirë janë shtylla të integrimit evropian. Në këtë kontekst, ai përmendi edhe arrestimin e zyrtarit serb Igor Popoviq në Kosovë, duke theksuar se çdo masë duhet të jetë e justifikuar dhe proporcionale.

Po ashtu, Kirchbaum përmendi arrestimin e Arbnor Spahiut nga autoritetet serbe, duke kërkuar që Serbia të sigurojë një proces të drejtë, në përputhje me Marrëveshjen për Drejtësinë, që parasheh zhvillimin e procedurave penale për veprat në Kosovë, brenda territorit të Kosovës.

Në fund, ai theksoi se respektimi i vlerave themelore evropiane dhe sundimi i ligjit është thelbësor për integrimin në BE.