Takohen Kurti dhe Abdixhiku, në përpkekje për të arritur marrëveshje

Prishtinë, 7 gusht 2026 13:55

Kryetari i Lidhjes Demokratike të Kosovës, Lumir Abdixhiku, ka mbërritur pasditen e së premtes në Kuvendin e Kosovës, ku ka nisur takimin me kryetarin e Lëvizjes Vetëvendosje, njëherësh kryeministër në detyrë, Albin Kurti.

Takimi, i cili ka filluar rreth orës 13:30, zhvillohet në një moment vendimtar për procesin e konstituimit të Kuvendit, pas dështimit të seancës së djeshme për zgjedhjen e organeve drejtuese.

Pas ndërprerjes së seancës, Kurti kishte kërkuar kohë shtesë për zhvillimin e takimeve me partitë parlamentare, me synimin për të gjetur një zgjidhje dhe për të siguruar mbështetjen e nevojshme për konstituimin e Kuvendit.

Vëmendja tashmë është përqendruar te ky takim, nga i cili pritet të shihet nëse palët do të arrijnë ndonjë marrëveshje që do t’i hapte rrugë vazhdimit të seancës konstituive dhe formimit të institucioneve të reja.

Ende nuk janë bërë të ditura detaje nga takimi, ndërsa pas përfundimit të tij pritet që Kurti dhe Abdixhiku t’u drejtohen mediave me deklarata lidhur me rezultatet e diskutimeve.