Fetoshi: Reagimet ndaj vizitës së Begajt në Luginë janë përpjekje për të relativizuar projektin e “Botës Serbe”

Prishtinë, 12 korrik 2026 10:16

Drejtori i Institutit OCTOPUS, Arben Fetoshi, vlerëson se reagimet e autoriteteve dhe diskursit politik në Serbi ndaj vizitës së Presidentit të Shqipërisë, Bajram Begaj, në Luginën e Preshevës, janë pjesë e një strategjie të komunikimit që synon relativizimin e projektit të ashtuquajtur “Bota Serbe”.

Në një analizë të publikuar me titull “Pasqyra e ‘Botës Serbe’”, Fetoshi thotë se paraqitja e vizitës së Begajt si dëshmi e një projekti të “Botës Shqiptare” nuk është rastësore, por, sipas tij, synon të krijojë një “simetri të rreme” mes politikave të Serbisë dhe mbështetjes së Shqipërisë për shqiptarët në Luginën e Preshevës, përcjell VeritasaInfo.

Ai thekson se narrativat që flasin për “Shqipërinë e Madhe” apo pretendimet se pas Kosovës do të pasojnë rajone të tjera të Serbisë, përdoren, sipas tij, për të larguar vëmendjen nga çështjet që prekin shqiptarët në Luginë, përfshirë diskriminimin dhe pasivizimin e adresave.

Fetoshi argumenton se mesazhet e Presidentit Begaj gjatë vizitës në Panairin e Librit dhe në takimet me përfaqësuesit lokalë kishin të bënin me mbështetjen për të drejtat e shqiptarëve në Luginën e Preshevës, por se, sipas tij, ato u interpretuan nga Serbia si kërcënim ndaj sovranitetit të saj.

Sipas drejtorit të Institutit OCTOPUS, kjo qasje përbën atë që ai e quan “propagandë e pasqyrës”, ku një shtet i atribuon palës tjetër qëllimet që, sipas tij, i ndjek vetë.

Në analizën e tij, Fetoshi pohon gjithashtu se “Bota Serbe” përfaqëson një projekt me synime rajonale, ndërsa mbështetja e Shqipërisë për shqiptarët në Luginën e Preshevës, sipas tij, kufizohet në mbrojtjen e të drejtave të tyre, si përfaqësimi institucional, përdorimi i gjuhës shqipe, arsimi dhe kultura.

Ai rikujton se organizata dhe institucione ndërkombëtare, përfshirë Shtetet e Bashkuara të Amerikës, Bashkimin Evropian, Këshillin e Evropës dhe OSBE-në, kanë ngritur vazhdimisht shqetësime për pozitën e shqiptarëve në Luginën e Preshevës dhe u kanë bërë thirrje autoriteteve serbe të adresojnë praktikat diskriminuese.

Në përfundim, Fetoshi vlerëson se reagimet ndaj vizitës së Presidentit Begaj synojnë njëkohësisht relativizimin e projektit të “Botës Serbe” dhe zhvendosjen e vëmendjes nga diskriminimi ndaj shqiptarëve në Luginën e Preshevës.