Kurti: Ka frymë konstruktive, por ende pa marrëveshje për institucionet

Prishtinë, 11 korrik 2026 07:11

Kryeministri në detyrë, Albin Kurti, ka bërë të ditur se në kuadër të konsultimeve për formimin e institucioneve të reja, pas zgjedhjeve të parakohshme parlamentare për legjislaturën e njëmbëdhjetë, ka zhvilluar takime të ndara me kryetarët e PDK-së dhe LDK-së.

Përmes një njoftimi, Kurti tha se është ende herët për të folur për rezultate konkrete, por u shpreh optimist për ecurinë e procesit.
Ai theksoi se fryma konstruktive që ka karakterizuar bisedimet nuk përbën ende marrëveshje apo garanci për sukses, megjithatë vlerësoi se takimet e para, të mbajtura pas certifikimit të rezultatit zgjedhor, krijojnë shpresë për avancim në fazat e ardhshme të konsultimeve.

Kurti shtoi se mbetet i angazhuar, së bashku me akterët politikë, për jetësimin e vullnetit të qytetarëve përmes krijimit të institucioneve të reja dhe funksionale, të cilat, sipas tij, do të punojnë në shërbim të qytetarëve dhe të Republikës së Kosovës.