Akti terrorist ndaj kanalit të Ibër-Lepencit në gjykim, sulmi me 20 kilogramë TNT që rrezikoi furnizimin me ujë dhe energji

Prishtinë, 9 korrik 2026 12:52

Mbi një vit e gjysmë pas sulmit terrorist që tronditi Kosovën, në Gjykatën Themelore në Prishtinë ka nisur procesi gjyqësor ndaj tre personave të akuzuar për organizimin dhe kryerjen e sulmit me eksploziv ndaj kanalit të Ibër-Lepencit në Varagë të Zubin Potokut.

Sulmi, i kryer me rreth 20 kilogramë eksploziv ushtarak (TNT), kishte në shënjestër një nga asetet më strategjike të infrastrukturës së vendit, duke vënë në rrezik furnizimin me ujë të pijshëm për mijëra qytetarë, funksionimin e termocentraleve dhe stabilitetin e sistemit energjetik të Kosovës.

Sipas aktakuzës së Prokurorisë Speciale, Dragisha Viçentijeviq, Jovan Viçentijeviq dhe Igor Dimoviq, në bashkëpunim me persona të tjerë ende të paidentifikuar, vendosën sasinë e eksplozivit në kanalin e Ibër-Lepencit me qëllim dëmtimin e infrastrukturës publike dhe cenimin e rendit kushtetues të Republikës së Kosovës. Prokuroria e cilëson veprimin si një akt terrorist të planifikuar, i orientuar kundër objekteve me rëndësi jetike për shtetin.

Në seancën e parë gjyqësore u paraqitën Dragisha dhe Jovan Viçentijeviq, ndërsa Igor Dimoviq po mbrohet në liri. Të tre akuzohen për terrorizëm, përkatësisht për rrezikim të rendit kushtetues përmes dëmtimit të instalimeve dhe pajisjeve publike.

Përveç dëmtimit fizik të kanalit, shpërthimi krijoi rrezik serioz për ndërprerjen e furnizimit me ujë dhe për funksionimin e sektorit energjetik, pasi kanali i Ibër-Lepencit furnizon me ujë një pjesë të konsiderueshme të vendit dhe ka rol të rëndësishëm në proceset industriale dhe prodhimin e energjisë. Sipas Prokurorisë, dëmi material i shkaktuar nga sulmi tejkalon 376 mijë euro.

Hetimet zbuluan gjithashtu se gjatë bastisjeve në pronat e dy prej të akuzuarve u sekuestruan armë dhe municion, për çka ata përballen edhe me akuzën për armëmbajtje pa leje.

Për shkak të natyrës së sulmit, objektivit të zgjedhur dhe pasojave që mund të kishte për sigurinë kombëtare dhe funksionimin e shërbimeve jetike, rasti i Ibër-Lepencit konsiderohet një nga proceset më të rëndësishme gjyqësore që lidhen me mbrojtjen e infrastrukturës kritike në Kosovë.