ATK: Masat ligjore do të zbatohen ndaj të gjitha palëve të përfshira në transaksione fiktive

Prishtinë, 8 korrik 2026 12:20

Administrata Tatimore e Kosovës (ATK) ka rikujtuar të gjitha bizneset se faturat dhe transaksionet e realizuara me biznese fiktive apo joaktive nuk do të njihen për qëllime tatimore, duke u bërë thirrje tatimpaguesve që të tregojnë kujdes në përzgjedhjen e partnerëve të tyre afaristë.

Sipas ATK-së, transaksionet e tilla nuk do të pranohen si shpenzime në Deklaratën e Tatimit në të Ardhura dhe as nuk do të njihen për kreditim të zbritshëm të Tatimit mbi Vlerën e Shtuar (TVSH).

Institucioni u ka bërë apel bizneseve që, para se të hyjnë në marrëdhënie bashkëpunimi, të verifikojnë statusin e partnerëve të tyre afaristë. Sipas ATK-së, ky veprim ndihmon në shmangien e përfshirjes në transaksione të parregullta dhe siguron respektimin e legjislacionit tatimor në fuqi.

ATK ka paralajmëruar gjithashtu se, në rastet kur identifikohen transaksione fiktive, do të ndërmerren masat e parapara me ligj ndaj të dyja palëve të përfshira në transaksion.

Në fund, Administrata Tatimore thekson se respektimi i detyrimeve tatimore është përgjegjësi e përbashkët dhe se zbatimi i rregullave kontribuon në ndërtimin e një ekonomie më të drejtë, më transparente dhe më të qëndrueshme.