Stërvitja shumëkombëshe në Kroaci në shënjestër të dezinformimit serb

Prishtinë, 5 korrik 2026 18:54

Pjesëmarrja e Forcës së Sigurisë së Kosovës (FSK) në një stërvitje të rregullt ushtarake ndërkombëtare në Kroaci është shfrytëzuar nga portali serb “Novosti” për të ndërtuar pretendime të pabazuara mbi gjoja përgatitje të fshehta ushtarake dhe kërcënime ndaj Serbisë. Një analizë e publikuar nga The Geopost vlerëson se raportimi përmban elemente të qarta të dezinformimit dhe manipulimit të fakteve.

Sipas analizës, artikulli i Novosti përdor një titull alarmues që lë të kuptohet se pas stërvitjes fshihen qëllime të fshehta ushtarake. Megjithatë, dokumentet dhe njoftimet zyrtare të autoriteteve kroate tregojnë se bëhet fjalë për stërvitjen shumëkombëshe Immediate Response, një aktivitet i planifikuar dhe i shpallur publikisht muaj më parë, në kuadër të bashkëpunimit ndërkombëtar në fushën e mbrojtjes.

Analiza thekson se portali serb e paraqet pjesëmarrjen e FSK-së si një zhvillim të jashtëzakonshëm, duke lënë jashtë kontekstin se në stërvitje marrin pjesë mbi 3 mijë ushtarë nga vende anëtare të NATO-s dhe shtete partnere. Aktiviteti organizohet nga Forcat e Armatosura të Kroacisë në bashkëpunim me Komandën e Ushtrisë Amerikane për Evropën dhe Afrikën dhe ka për synim përmirësimin e bashkëpunimit, logjistikës dhe gatishmërisë ushtarake, e jo përgatitjen për ndonjë konflikt.

Një tjetër element që, sipas The Geopost, është lënë qëllimisht jashtë raportimit të Novosti është fakti se edhe Serbia merr pjesë rregullisht në stërvitje shumëkombëshe me partnerë ndërkombëtarë, përfshirë ushtrime të organizuara së bashku me ushtrinë amerikane dhe vendet e rajonit. Ky kontekst, sipas analizës, do të rrëzonte narrativën se pjesëmarrja e FSK-së përbën një kërcënim të veçantë për Serbinë.

Në përfundim, analiza arrin në vlerësimin se pretendimet për “qëllime të fshehta” apo “kërcënime të papritura” nuk mbështeten nga asnjë fakt zyrtar. Përkundrazi, stërvitja është pjesë e një kalendari të rregullt ushtarak ndërkombëtar, i publikuar paraprakisht dhe i zhvilluar në mënyrë transparente, duke e bërë raportimin e portalit serb një shembull të përdorimit të një ngjarjeje reale për të ndërtuar narrativa dezinformuese.