Haxhiu vizitoi Agjencinë e Kosovës për Inteligjencë, vlerësoi profesionalizmin e zyrtarëve të Agjencisë

Prishtinë, 3 korrik 2026 19:48

Kryetarja në detyrë e Kuvendit të Republikës së Kosovës, Albulena Haxhiu, zhvilloi sot një vizitë në Agjencinë e Kosovës për Inteligjencë, ku u prit nga drejtori i Agjencisë, Petrit Ajeti, dhe zyrtarë të tjerë të institucionit.

Gjatë vizitës, Haxhiu u njoftua nga afër me punën, organizimin dhe prioritetet e Agjencisë së Kosovës për Inteligjencë, si institucion kyç në mbrojtjen e sigurisë dhe interesave të Republikës së Kosovës.

Me këtë rast, ajo shprehu vlerësimin për profesionalizmin dhe përkushtimin e zyrtarëve të Agjencisë së Kosovës për Inteligjencë në përmbushjen e misionit të tyre kushtetues dhe ligjor, duke theksuar rëndësinë e rolit që Agjencia ka në garantimin e sigurisë kombëtare.

Haxhiu theksoi se forcimi i kapaciteteve të institucioneve të sigurisë dhe bashkëpunimi i ngushtë ndërinstitucional mbeten parakushte për një Republikë të sigurt, demokratike dhe të përgatitur për t’u përballur me sfidat e së ardhmes.