Qytetarët që kalojnë nëpër Serbi këshillohen të kenë kujdes me aktivitetin në rrjetet sociale

Prishtinë, 28 qershor 2026 15:28

Avokati Arianit Koci ka apeluar qytetarët që planifikojnë të udhëtojnë ose të kalojnë tranzit nëpër Serbi, duke i këshilluar të kenë kujdes me përmbajtjet që kanë publikuar në rrjetet sociale dhe platforma të tjera publike.

Sipas tij, postimet që mund të konsiderohen fyese, kërcënuese ose që interpretohen si nxitje e urrejtjes, mund të tërheqin vëmendjen e autoriteteve serbe.

“Keni parasysh se komentet që mund të keni publikuar në rrjete sociale, forume apo platforma të tjera publike në internet – nëse janë fyese, kërcënuese ose mund të interpretohen si nxitje e urrejtjes, mund të kenë pasoja juridike”, ka shkruar Koci.