Mungesa e gjuhës shqipe në Federatën e Gjahtarëve në Maqedoninë e Veriut, kërkohet ndërhyrje institucionale

Prishtinë, 10 nëntor 2026 11:04

Mungesa e përdorimit të gjuhës shqipe në Federatën e Gjahtarëve të Maqedonisë së Veriut ka nxitur reagime dhe shqetësime për respektimin e të drejtave gjuhësore të gjahtarëve shqiptarë.

Federata e Gjahtarëve të Kosovës ka kërkuar që gjuha shqipe të trajtohet në mënyrë të barabartë në dokumentacionin zyrtar, komunikimin institucional dhe veprimtarinë profesionale të federatës homologe në Maqedoninë e Veriut.

Kryetarja e Federatës së Gjahtarëve të Kosovës, Evelina Ajazaj-Leka, ka bërë të ditur se problemet e evidentuara përfshijnë mungesën e shqipes në dokumentet zyrtare, mbishkrimet institucionale, literaturën profesionale dhe testet e provimeve për gjahtarë.

Sipas saj, kjo çështje është ngritur edhe gjatë takimit bilateral të mbajtur më 5 nëntor në Prishtinë, ku është nënshkruar Marrëveshja e Bashkëpunimit ndërmjet dy federatave. Në takim ishte i pranishëm edhe kryetari i Federatës së Gjahtarëve të Maqedonisë së Veriut, Vllatko Aleksovski.

Ajazaj-Leka ka theksuar se çështja kërkon zgjidhje institucionale dhe nuk duhet të personalizohet apo t’i atribuohet vetëm një individi.

Një tjetër shqetësim i ngritur lidhet me mungesën e përfaqësuesve shqiptarë në Komisionin Shtetëror për provimet nga fusha e gjuetisë. Sipas Federatës së Gjahtarëve të Kosovës, kjo situatë ngre pikëpyetje për përfshirjen e shqiptarëve në strukturat që merren me testimin dhe kualifikimin profesional të gjahtarëve.

Për këtë arsye, Ajazaj-Leka u ka bërë thirrje përfaqësuesve politikë shqiptarë në Kuvend dhe në institucionet qeveritare të Maqedonisë së Veriut që të angazhohen më fuqishëm për zbatimin praktik të të drejtave gjuhësore dhe përfaqësimin e barabartë.

Ajo ka ritheksuar se përdorimi i gjuhës shqipe nuk duhet të mbetet vetëm një deklarim parimor, por të jetë pjesë e praktikës së përditshme institucionale.

“Barazia gjuhësore nuk është privilegj, por e drejtë”, është mesazhi i përcjellë nga kryetarja e Federatës së Gjahtarëve të Kosovës.

Federata e Gjahtarëve të Kosovës ka shprehur gjithashtu gatishmërinë për të ofruar përvojën dhe mbështetjen e saj institucionale për adresimin e kësaj problematike.

Sipas reagimit, bashkëpunimi ndërmjet dy federatave daton që nga viti 2022, ndërsa takimi i fundit në Prishtinë synon vazhdimin e marrëdhënieve institucionale dhe trajtimin e çështjeve të përbashkëta.