Kurti kërkon nga udhëheqja e re e Serbisë njohjen e pavarësisë së Kosovës

Prishtinë, 10 nëntor 2026 18:29

Kryeministri Republikës së Kosovës, Albin Kurti, ka kërkuar që udhëheqja e re e Serbisë ta njohë realitetin politik dhe shtetëror të Kosovës, duke theksuar se normalizimi i marrëdhënieve ndërmjet dy vendeve duhet të bazohet në njohjen e ndërsjellë dhe përgjegjësinë për sulmin në Banjskë.

Këto deklarata Kurti i bëri gjatë një bashkëbisedimi me studentët e Paris School of International Affairs (PSIA), në Paris, ku foli për zhvillimet politike në Serbi dhe raportet ndërmjet Prishtinës dhe Beogradit.

Ai theksoi se ndryshimet e fundit në udhëheqjen politike të Serbisë duhet të shoqërohen edhe me ndryshim të qasjes ndaj Kosovës.

Sipas Kurtit, Serbia duhet ta pranojë realitetin e shekullit XXI, përkatësisht faktin se Kosova është shtet i pavarur dhe i njohur ndërkombëtarisht nga mbi 120 shtete.

Kreu i Qeverisë kërkoi gjithashtu që Beogradi të heqë dorë nga përpjekjet për pengimin e anëtarësimit të Kosovës në organizatat ndërkombëtare.

Një tjetër çështje që Kurti e konsideroi të rëndësishme për normalizimin e marrëdhënieve është përgjegjësia për sulmin e armatosur në Banjskë, më 24 shtator 2023.

Ai kërkoi dorëzimin e Milan Radoiçiqit, të cilin e cilësoi si arkitektin kryesor të sulmit, në mënyrë që të përballet me drejtësinë.

Megjithatë, ndryshimi i udhëheqjes politike në Serbi nuk është shoqëruar deri më tani me sinjale publike për ndryshim të qëndrimit ndaj statusit të Kosovës. Edhe Lista Studentore, e cila ka fituar zgjedhjet në Serbi, ka mbajtur qëndrimin se Kosova është pjesë përbërëse e Serbisë, duke iu referuar Kushtetutës së këtij shteti.