Krijimi i Xhandarmërisë së Kosovës, Morina: Numri i pjesëtarëve mund të arrijë deri në 2 mijë

Prishtinë, 29 maj 2026 20:31

Në legjislaturën e re të Kuvendit të Kosovës, pritet të vijë një ligj i veçantë.

Përmes tij, synohet që Kosova ta ketë xhandarmërinë e saj.

Por nga ekzekutivi në detyrë nuk treguan për numrin që është përcaktuar në këtë forcë.

Modelet e tilla janë të mirëseardhura për njohësit e fushës së sigurisë.

Për ish drejtorin e Policisë, Reshat Maliqin, dallon territori i Kosovës me këto vende.

Ai thotë se numri mund të përshtatet sipas vendbanimit, por sipas tij, një pjesë e territorit me Serbinë ka nevojë për patrulla të xhandarmërisë.

“Territori në Francë e në Itali është shumë më i madh se në Kosovë edhe ne nuk kemi nevojë për një forcë aq të madhe 100 mijë. E rëndësishme është që është mirë që po krijohet, e varësisht prej nevojave më vonë do të shikohet se a ka nevojë psh nëse bëhet nga 500 deri në 1000 oficerëve të xhandarmërisë, pastaj nevojat e shohin a duhet të ketë rritje të tyne, ngritjen e tyne, trajnimin e tyne, do ia përshtatin territorin e Kosovës pasi ne rreziqet më të mëdhaja i kemi nga Serbia, nuk kemi nevojë psh nga ana e Shqipërisë”, thotë Maliqi.

Që numri i pjesëtarëve duhet të përshtatet me territorin e thotë edhe ish eprori i Policisë së Kosovës, Refki Morina.

Morina jep detaje se si mund te jenë fazat për përcaktimin e numrit të kësaj force.

“Numri i njësitit të xhandarmërisë varet prej madhësisë së territorit, numrit të banorëve pastaj prej rrezikshmërisë së vendit kufijve tonë, kostos për arsye se një formim i tillë i njësiteve kushton, i kushton shtetit prandaj në kushtet reale objektive në bazë të këtyre rrethanave çfarë i ka Kosova unë mendoj se në fazën e parë  fillestare diku do të jetë numri i njësitit të xhandarmërisë 800 deri në 1200 për t’u përgatitur mirë me pajisje të përgatitura mirë ndërsa faza e fundit mendoj që do të jetë numri 1500 deri në 2000 të trajnuar mirë”, thotë Morina.

Nga Qeveria në detyrë kanë thënë se krijimi i xhandarmërisë po bëhet për shkak të nevojës së domosdoshme për sigurinë kombëtare dhe përballjen me sfidat që vijnë nga Serbia.