Maqedonci në SHBA takon Daniel Zimmermanin, diskutojnë për sigurinë dhe anëtarësimin e Kosovës në NATO

Prishtinë 28 Maj 2026 12:19

Ministri në detyrë i Mbrojtjes po qëndron në SHBA, Ejup Maqedonci në Departamentin e Luftës ka takuar Ndihmës Sekretarin e Luftës Daniel Zimmerman.

Ai ka thënë se me të kanë zhvilluar diskutime të rëndësishme mbi situatën e përgjithshme të sigurisë, thellimin dhe zgjerimin e bashkëpunimit në fushën e mbrojtjes, zhvillimin e mëtejmë të FSK-së, bashkëpunimin në industrinë e mbrojtjes, si dhe angazhimet tona të përbashkëta për paqe, siguri dhe stabilitet në botë.

“Ndihmës Sekretari Zimmerman vlerësoi lart rritjen e investimeve të Qeverisë së Republikës së Kosovës në mbrojtje, vizionin për zhvillimin e industrisë së mbrojtjes dhe progresin që Kosova ka arritur në forcimin e kapaciteteve ushtarake. Ai gjithashtu vlerësoi vendimet e Qeverisë dhe Kuvendit të Kosovës për angazhimin e ushtarakëve tanë krah forcave amerikane në operacionet për mbështetjen e paqes, si dhe përkrahjen e vazhdueshme për Ukrainën”, ka thënë Maqedonci.

Ai ka thënë se kanë diskutuar edhe për projekte të përbashkëta strategjike që do ta thellojnë partneritetin tonë me SHBA-të dhe do ta formësojnë rrugëtimin e Kosovës drejt anëtarësimit në NATO.

“Partneriteti me Shtetet e Bashkuara mbetet themel i sigurisë sonë dhe garanci për ndërtimin e një ushtrie moderne, profesionale dhe të gatshme për t’i dalë zot vendit në çdo rrethanë”, ka shtuar ai.