Mijëra hektarë po trajtohen kundër rriqrave bartës të virusit të etheve hemorragjike

Prishtinë, 28 maj 2026 12:02
Procesi i dizensektimit për parandalimin e Etheve Hemorragjike Krime-Kongo është duke u zhvilluar në komunën e Malishevës, në kuadër të masave parandaluese për mbrojtjen e shëndetit publik.
Ministria e Bujqësisë, Pylltarisë dhe Zhvillimit Rural ka bërë të ditur se projekti shumëvjeçar, i cili do të zgjasë deri në vitin 2028, po realizohet në zonat me rrezik të lartë nga përhapja e rriqrave bartëse të virusit.
Sipas ministrisë, trajtimi është duke u kryer në mijëra hektarë sipërfaqe në komunat endemike, përfshirë Malishevën, Klinën, Rahovecin, Suharekën dhe Drenasin, me qëllim uljen e rrezikut për qytetarët.
Autoritetet kanë theksuar se gjatë procesit po përdoren preparate të aprovuara dhe metoda të sigurta, në koordinim me Institutin Kombëtar të Shëndetësisë Publike të Kosovës dhe institucionet lokale.
Ethet Hemorragjike Krime-Kongo vazhdojnë të konsiderohen shqetësim në disa rajone të Kosovës, ndërsa institucionet kanë apeluar për kujdes dhe respektim të rekomandimeve parandaluese.