Policia e Kosovës: Postimi kërcënues ndaj Kurtit erdhi nga Kraljeva e Serbisë

Prishtinë, 08 maj 2026 22:16

Policia e Kosovës ka bërë të ditur se po zhvillon hetime intensive lidhur me një kërcënim të publikuar në rrjetet sociale ndaj kryeministrit të Kosovës, Albin Kurti, nga profili “Severna Brigada”, organizatë e shpallur terroriste nga institucionet e Kosovës.

Sipas njoftimit të Drejtorisë për Hetimin e Krimit të Organizuar dhe Krimeve të Rënda, rasti është pranuar në trajtim më 8 maj 2026, ndërsa në koordinim me Prokurorinë Speciale të Republikës së Kosovës janë ndërmarrë menjëherë veprime hetimore, me mbështetjen edhe të Drejtorisë për Hetimin e Krimeve Kibernetike.

Nga hetimet e para është konstatuar se kërcënimi është publikuar përmes llogarisë “Severna Brigada” në rrjetet sociale.

Policia ka njoftuar se, bazuar në të dhënat e siguruara, postimi dyshohet se është bërë nga territori i Serbisë, konkretisht nga qyteti i Kraljevës. Sipas autoriteteve, janë identifikuar IP-adresa e përdorur si dhe të dhënat personale të përdorura gjatë regjistrimit të llogarisë.

Tutje, thuhet se njësitë kompetente kanë siguruar edhe të dhëna shtesë që pritet të ndihmojnë në vazhdimin e hetimeve nga Policinë e Kosovës dhe Prokurorinë Speciale.