FSK-ja avancon shkathtësitë taktike kundër terrorizmit 

Prishtinë, 10 nëntor 2026 08:16

Pjesëtarë të Forcës së Sigurisë së Kosovës kanë marrë pjesë në trajnimin ndërkombëtar “Training Based on SOP – Standards of Interventions”, i cili është zhvilluar në qytetin e Slunjit, në Kroaci.

Në këtë trajnim morën pjesë pjesëtarë të Togut për Intervenime nga Policia Ushtarake e FSK-së, ndërsa aktivitetet u udhëhoqën nga instruktorë të Njësisë Kundër Terrorizmit të Policisë Ushtarake Kroate.

Gjatë trajnimit u zhvilluan një sërë aktivitetesh praktike, të fokusuara në ngritjen e kapaciteteve profesionale dhe avancimin e shkathtësive në fushën e intervenimeve.

Përveç zhvillimit të aftësive taktike, trajnimi shërbeu edhe si mundësi për shkëmbimin e përvojave profesionale dhe forcimin e bashkëpunimit ndërmjet pjesëtarëve të forcave pjesëmarrëse.

Pjesëmarrja e FSK-së në aktivitete të tilla ndërkombëtare është pjesë e angazhimeve për avancimin e vazhdueshëm të profesionalizmit, gatishmërisë dhe kapaciteteve operacionale të pjesëtarëve të saj.