Armë, uniforma ushtarake dhe municion në një shtëpi të braktisur në Zubin Potok

Prishtinë 30Mars 2026 8:13

Një arsenal i dyshimtë është zbuluar në një shtëpi të pabanuar në fshatin Prelez të Zubin Potokut, ku policia ka gjetur armë, uniforma ushtarake dhe municion.

Sipas burimeve, ngjarja është konstatuar pasditen e 29 marsit 2026, rreth orës 15:50, gjatë një patrullimi të njësive të reagimit të shpejtë.

Gjatë kontrollit në objektin e braktisur, policët kanë gjetur një armë të shkurtër të tipit “CZ-7.65”, prodhim çek. Po ashtu, janë sekuestruar dy uniforma të ushtrisë serbe, një karikator i zbrazët i armës automatike AK-47, si dhe tri gëzhoja të kalibrit 7.62 mm.

Në vendngjarje janë gjetur edhe dokumente identifikimi që, sipas informacioneve paraprake, i përkasin pronarit të banesës, i cili dyshohet se ka ndërruar jetë.

Menjëherë pas zbulimit, në vend kanë mbërritur forcat e policisë, hetuesit dhe ekspertët e kriminalistikës, të cilët kanë kryer këqyrjen dhe kanë sekuestruar provat materiale.

Në konsultim me prokurorin e çështjes, rasti është regjistruar për veprën penale “Mbajtja në pronësi, kontroll ose posedim të paautorizuar të armëve”.

Hetimet vijojnë për të zbardhur rrethanat dhe për të identifikuar personat përgjegjës.