Osmani: Lufta e UÇK-së ishte e drejtë, nuk ndryshohet me tentime për ta rishkruar historinë

Prishtinë 9 Shkurt 2026 16:03

Presidentja e Kosovës, Vjosa Osmani ka thënë se lufta e UÇK-së ishte e drejtë dhe e pastër dhe se kjo e vërtetë sipas saj nuk mund të ndryshohet me tentime për ta rishikuar historinë.

Në një reagim pas kërkesës së Prokurorisë Speciale të Kosovës për të dënuar me nga 45 vjet burgim secilin nga ish- krerët e UÇK-së, ka thënë se përpjekjet për ta barazuar luftën çlirimtare me krimet e Serbisë, minojnë besimin në drejtësi e paqe afatgjate.

“Gjenocidi, krimet kundër njerëzimit dhe krimet e luftës janë krime që Serbia i kreu kundër popullit të Kosovës ndër shekuj. Gjatë luftës së fundit në Kosovë, Serbia kishte për qëllim shfarosjen e popullit shqiptar, qëllim të cilin e shpërfaqi nëpërmjet vrasjes dhe masakrimit të mijërave fëmijëve, grave, burrave e të moshuarve, dhunimeve të mijëra grave e burrave, shkatërrimit të qindra mijëra shtëpive, dëbimit të mbi 80% të qytetarëve të Kosovës nga shtëpitë e tyre, spastrimit etnik, zhdukjes me dhunë të mijëra personave dhe krimeve të tjera të llahtarshme. Çdo përpjekje që tenton të barazojë luftën çlirimtare të UÇK-së me krimet e agresorit gjenocidal serb e minon besimin në drejtësi dhe e dëmton rëndë paqen afatgjatë. Kosova dhe qytetarët e saj kërkojnë drejtësi. Lufta e UÇK-së ishte e drejtë dhe e pastër. Kjo e vërtetë nuk ndryshohet me tentime për ta rishkruar historinë dhe për ta njollosur dhe zhvleftësuar betejën e popullit të Kosovës për liri”, ka shkruar ndër të tjera Osmani.

Propozimi i Speciales ka ngjallur reagime në Kosovë.