Osmani përfaqësuesit francez: Radoiçiqi pengonte normalitetin, jo urat

27 gusht, 2025

Presidentja e Kosovës, Vjosa Osmani, ka deklaruar se veprimtaria kriminale e Milan Radoiçiqit dhe grupeve ilegale në veri kanë qenë pengesa kryesore për normalitetin dhe lëvizjen e lirë të qytetarëve, e jo urat mbi lumin Ibër.

Gjatë takimit me të dërguarin e posaçëm të Francës për Ballkanin Perëndimor, ambasadorin Rene Troccaz, Osmani tha se mirëpret hapjen e urave të reja në Mitrovicë, duke theksuar se mbyllja e urës kryesore më 1999 nuk ishte për arsye sigurie, por si rezultat i vendimeve të dëmshme politike. Ajo shtoi se është për keqardhje që kjo urë mbetet e mbyllur edhe pas një dekade nga marrëveshja e Brukselit.

“Është veprimtaria kriminale dhe destabilizuese e Radoiçiqit dhe grupeve kriminale në veri që pengonte normalitetin dhe lëvizjen e lirë, duke krijuar atmosferë frike e tensioni, e jo urat,” ka theksuar Osmani. Ajo nënvizoi se këto struktura ilegale janë përgjegjëse për dhunën dhe tensionet, dhe jo infrastruktura që ndërtohet për të lidhur komunitetet.

Presidentja gjithashtu i ka konsideruar të padrejta masat kufizuese të Bashkimit Evropian ndaj Kosovës, duke thënë se ato dëmtojnë mirëqenien e qytetarëve, proceset demokratike dhe kredibilitetin e dialogut të udhëhequr nga BE-ja.

Në takim u diskutuan gjithashtu zhvillimet politike në Kosovë dhe siguria rajonale, ku Osmani përsëriti orientimin strategjik të vendit drejt integrimit në BE dhe NATO.