Kurti: Dokumentimi i krimeve ekonomike në luftë i shërben kujtesës kolektive

27 gusht, 2025

Instituti i Krimeve të Kryera Gjatë Luftës ka prezantuar sot aneksin e metodologjisë së punës për dokumentimin dhe hulumtimin e krimeve ekonomike të shkaktuara gjatë luftës në Kosovë.

Kryeministri në detyrë i Kosovës, Albin Kurti, theksoi se përveç jetëve të humbura dhe dëmeve njerëzore, agresioni serb ka shkaktuar pasoja të mëdha ekonomike. Ai theksoi rëndësinë e ruajtjes së kujtesës historike përmes dokumentimit të këtyre krimeve.

“Dokumentimi i krimeve ekonomike është pjesë e pandashme e së vërtetës historike. Përveç funksionit arkivor e akademik, ky proces përfaqëson një instrument drejtësie dhe transparence. Përmes një metodologjie të qartë, profesionale dhe gjithëpërfshirëse mund të krijojmë një arkiv të besueshëm që do t’i shërbejë kujtesës kolektive të brezave që vijnë”, deklaroi Kurti.

Drejtori ekzekutiv i Institutit, Atdhe Hetemi, foli për të arriturat e deritanishme dhe bashkëpunimet me Shqipërinë, Maqedoninë e Veriut, Malin e Zi dhe Bosnje e Hercegovinën. Ai nënvizoi se aneksi metodologjik është një përpjekje e përbashkët për të siguruar që mbledhja, verifikimi dhe analiza e krimeve ekonomike, sociale e kulturore të bëhen sipas standardeve më të larta etike, ligjore dhe shkencore.