Kosova dhe Hungaria thellojnë bashkëpunimin në fushën e bibliotekave

Prishtinë, 22 tetor 2026 07:07

Kosova dhe Hungaria kanë konkretizuar bashkëpunimin në fushën e bibliotekave përmes nënshkrimit të një memorandumi mirëkuptimi ndërmjet Bibliotekës Kombëtare të Kosovës “Pjetër Bogdani” dhe Bibliotekës Kombëtare Széchényi të Hungarisë.

Memorandumi synon forcimin e bashkëpunimit përmes projekteve të përbashkëta kulturore, shkëmbimit të stafit dhe trajnimeve profesionale, me fokus të veçantë në fushën e digjitalizimit.

Marrëveshja u nënshkrua nga drejtoresha e përgjithshme e Bibliotekës Kombëtare të Kosovës, Blerina Rogova-Gaxha, dhe drejtoresha e përgjithshme e Bibliotekës Kombëtare Széchényi, Judit Gerencsér.

Në takimin e zhvilluar me këtë rast morën pjesë edhe sekretari i Ministrisë së Kulturës në Kosovë, Bislim Bislimi, si dhe përfaqësues të Ministrisë së Punëve të Jashtme të Hungarisë.

Sipas njoftimit, bashkëpunimi është mundësuar falë angazhimit të ambasadorit të Kosovës në Hungari, Delfin Pllana, i cili ka mbështetur realizimin e kësaj iniciative dhe vizitën e delegacionit.

Gjatë vizitës, përfaqësuesit e Kosovës u njohën me punën e Bibliotekës Kombëtare Széchényi, shërbimet për përdoruesit, proceset e digjitalizimit dhe praktikat për ruajtjen e koleksioneve bibliotekare.

Nënshkrimi i memorandumit synon të krijojë mundësi të reja për shkëmbimin e përvojave dhe njohurive profesionale, si dhe të kontribuojë në forcimin e lidhjeve kulturore ndërmjet Kosovës dhe Hungarisë.